कराड (सातारा) : श्री क्षेत्र पंढरपूर येथील श्री विठ्ठल रुक्मिणी मंदिर समितीच्या अध्यक्षपदी भारतीय जनता पक्षाचे महाराष्ट्र प्रदेश चिटणीस आणि कराड येथील कृष्णा सहकारी बँकेचे चेअरमन डॉ. अतुल भोसले यांची निवड झाली आहे. राज्य सरकारने ही निवड जाहीर केली आहे. त्यांच्या या निवडीबद्दल कराड, मलकापूर भागातील कार्यकर्त्यांनी जल्लोष केला. डॉ. अतुल भोसले यांनी श्री विठ्ठल रुक्मिणी मंदिरात जाऊन श्री विठ्ठलाचे दर्शन घेतले.
लहानपणापासूनच त्यांना घरात सामाजिक व राजकीय कार्याचा वारसा लाभला असून, सहकारमहर्षी स्वर्गीय जयवंतराव भोसले यांचे ते नातू आहेत. अतुल भोसले यांचे वडील डॉ. सुरेश भोसले हे निष्णात सर्जन म्हणून, ख्यातकीर्त असून सहकार, सामाजिक आणि शैक्षणिक क्षेत्रातील संयमी नेतृत्व म्हणूनही त्यांना ओळखले जाते.
२०१४मध्ये त्यांनी कराड दक्षिण विधानसभा मतदारसंघातून तत्कालीन मुख्यमंत्री पृथ्वीराज चव्हाण व माजी मंत्री आमदार विलासकाका पाटील-उंडाळकर यांच्या विरोधात भाजपकडून निवडणूक लढवून, तब्बल ५८ हजार मते मिळविली होती. डॉ. अतुल भोसले यांच्या नेतृत्वाखाली कराड नगरपालिकेच्या इतिहासात पहिल्यांदाच भाजपचा नगराध्यक्ष निवडून आला आहे. तसेच नुकत्याच झालेल्या जिल्हा परिषद आणि पंचायत समिती निवडणुकीत भाजपला घवघवीत यश मिळवून देण्यात त्यांचा मोठा वाटा आहे. पश्चिम महाराष्ट्रात आणि विशेषतः सातारा जिल्ह्यात भाजपचा चेहरा म्हणून डॉ. अतुल भोसले यांना ओळखले जाते.